दाङ। नेपाल प्रिमियर लिग (एनपीएल) सिजन–३ अन्तर्गत कर्णाली याक्सबाट खेल्न जान लागेका दाङका क्रिकेट खेलाडी दिवान पुनलाई दाङमा सम्मान तथा बिदाइ गरिएको छ । बिहीबार तुलसीपुरमा आयोजित एक कार्यक्रमबीच पुनलाई क्रिकेट तथा खेलप्रेमी युवा, खेलाडी तथा शुभेच्छुकहरूले सम्मानसहित बिदाइ गरेका हुन् ।
कर्णाली प्रदेश क्रिकेट टोलीका कप्तानसमेत रहेका पुनले एनपीएलको आगामी सिजनमा कर्णाली याक्सको प्रतिनिधित्व गर्दै प्रतिस्पर्धा गर्नेछन् । दाङबाट राष्ट्रिय स्तरको क्रिकेटमा आफ्नो पहिचान बनाउँदै आएका पुनलाई एनपीएलमा उत्कृष्ट प्रदर्शनका लागि शुभकामनासहित बिदाइ गरिएको हो ।
कार्यक्रममा सहभागी खेलप्रेमी युवाहरूले पुनको सफलताले दाङ तथा समग्र कर्णाली क्षेत्रको क्रिकेट विकासमा समेत सकारात्मक सन्देश दिने विश्वास व्यक्त गरेका थिए । उनीहरूले पुनलाई एनपीएलमा उत्कृष्ट प्रदर्शन गर्दै जिल्लाको नाम उच्च राख्न शुभकामना दिएका छन् ।
पुनको क्रिकेट यात्रामा निरन्तर साथ र हौसला प्रदान गर्दै आएका खेलप्रेमी तथा युवाहरूले आगामी दिनमा पनि स्थानीय स्तरबाट खेलाडी उत्पादन र क्रिकेट विकासका लागि सक्रिय भूमिका खेल्ने बताएका छन् । एनपीएलमा कर्णाली याक्सबाट मैदानमा उत्रिन लागेका पुनले आफ्नो प्रदर्शनमार्फत दाङको क्रिकेट प्रतिभालाई राष्ट्रियस्तरमा थप स्थापित गर्ने अपेक्षा गरिएको छ ।।
